釜山電影節前晚開幕，章子怡又再次甩底，得番張栢芝為電影《危險關係》宣傳。
噚日到《危》片舉行記者會，同張栢芝傳不和嘅章子怡終於一齊出現。喺會上兩人雖然有交談，但先係暗地過招鬥裙短，跟住上台後章子怡用手勢加嘴形同台下講「Hello」，仲用韓文話：「你們好，我是章子怡。」然後反問：「Correct？（對吧）」先贏一仗。及後栢芝接受台下訪問，好認真咁講角色嗰時，章子怡又再出招攞部手機反拍台下記者，拍完再反轉手機騷畫面舉起手指讚好，引嚟記者狂影相，擺明唔畀面栢芝，果然薑係老嘅辣。
城城戥黎明可惜
另外，郭富城同梁家輝一齊出席電影節為《寒戰》宣傳，城城被問到黎明離婚一事，即刻收起笑容，連嘆三口氣話：「呢件唔係一件快樂嘅事，我唔想回應，你睇我嘅臉色就知道回應咗。」梁家輝則說：「好遺憾，要黎明結婚已經好難，佢離婚一定更難。」
