除咗撤回同唔撤回國教科之間有好大空間之外，華華相信喺發出同唔發出新免費電視牌之間都一樣有好大討論空間，皆因上星期又有報道話CY政府正醞釀再做市場研究，要檢視香港承受新免費電視營運商嘅能力，咁即係仲未拍板啦。
三餸一湯慰勞演員
不過已經「賣仔」押注電視業嘅城電（1137）主席王維基（Ricky）就一於少理，繼續佢哋喺堆填區製作中心嘅第二期招標，預期今季動工，出年第四季完工。
牌又未發、廠又未起好，Ricky家陣忙乜好呢？原來Ricky最近成日去探班（其實監工先真）拍攝緊嘅兩部電視劇，聽講剛剛過去嘅國慶、中秋長假，Ricky四日都去咗片場辣更，而且唔係去show一show up就撇，去親起碼留半日，除咗睇靚女陳霽平有份嘅《三面形醫》，噚日佢又去咗中環睇黃日華父女同李璨琛拍緊嘅《開腦儆探》。
老闆親自監工，真係想蛇吓都難，但亦有其好處，例如萬歲咁就走唔甩啦，最重要係畀佢知道拍外景時伙食有幾差，所以家陣城電會向拍外景嘅同事提供三餸一湯、白飯任裝（山旮旯地方例外），而伙食係城電葵涌辦公室canteen出品，至於好食與否，華華就唔知喇。
李華華
mailto:[email protected]