恒指今年頭三季係升、跌、升，值得留意係上一季度嘅10強藍籌股，喺跟住嘅季度就全數十強不入，呢個情況連續兩季出現。回顧第三季，10強藍籌股有6隻係本地地產股，如果趨勢持續，本地地產股今季將會跌出十強榜。
睇技術走勢，藍籌地產股中恒基地產（012）、新鴻基地產（016）同新世界發展（017）嘅9周RSI都升近80，中線調整壓力偏高，支持上述季度數據結論，所以要搵第四季好股，就要諗第二個板塊。
至於季度10弱藍籌股，亦少有股份能夠喺之後嘅季度Turnaround，以今年第一、二季為例，各只有兩隻弱勢藍籌股能夠成為下季度嘅10強。所以，要搵季度強股，可以收窄喺上季度嘅中游藍籌股埋手。
撇除上季10強10弱藍籌後，整個板塊股份都處於上季藍籌股中游位置嘅，包括本地銀行股、石油股、港口股、內房股同埋煤炭股，當中港銀股同內房股都喺52周高位附近，相信爆升空間較弱，好難成為強勢板塊，至於油股同煤炭股走勢近似，而中國神華（1088）、中海油（883）同中煤能源（1898）當中，就以神華中線走勢比較強。點解煤炭市場咁差，神華走勢仲好過中海油？相信係同神華良好嘅基本因素有關。
上望36蚊升兩成
目前內地動力煤市場面對需求疲弱，煤炭價格處於偏低水平，神華本身擁有發電業務，一條龍業務有晒協同效益，煤炭銷售成本又比同業有優勢，所以盈利表現衰極有個譜。神華上半年每股盈利1.344元人民幣，券商平均估下半年剩番0.943人民幣，市盈率10.7倍左右，假設出年全年維持今年下半年咁差嘅環境，市盈率都係13倍，睇嚟估值已經反映家困難嘅經營環境，未來下跌空間有限。
如果第四季買入神華持有，就係博煤價早啲見底回升，股價上升空間又可能唔小，博神華成為今季強股，升幅有兩成，就可以上望36蚊。
另外，金價喺每盎斯1800美元樓下爭持咗一排，似乎有突破1800美元關嘅動力，你睇招金礦業（1818）9月14日大升一棍之後，一直向上傾，頭也不回，似乎最有動力上升嘅係佢，值得繼續持有。
晉佳
本欄逢周一、三及五刊出