喺美國唔鍾意熱火「大帝」勒邦占士嘅球迷，成日都好冇品咁笑佢髮線極速向後移。不過，上一季佢又做MVP，又拎到總冠軍同倫奧金牌，喺新廣告度連髮線都有推前嘅迹象；唔怪得佢喺廣告入面咁有型，好似自信返晒嚟啦！但係佢突然變「髮」，好有可能造假。
廣告相髮線突然向前
話說「一剔牌」最近幫呢位27歲嘅前鋒推出LeBron James Diamond Collection，仲拍埋新廣告相；睇張相，佢嗰個日漸嚴重嘅M字額，竟然唔見咗！呢幾年不斷後退，搞到大帝條headband要越戴越後嘅髮線，突然向前推進，變番喺一個正常27歲應有嘅位置！呢一張相引嚟美國傳媒嘅揣測，估佢係咪學英超曼聯前鋒朗尼，走去植髮解決髮線問題。
不過，睇番佢日前喺Twitter上載嘅生活照，只見佢M字額仍在，髮線都冇向前；咁係咪表示贊助商喺張相做手腳，用「還原靚靚拳」將佢條髮線移番前？不過，大帝出名唔俾人笑得，亦有機會係佢自尊心作祟，特登拜託人幫佢執過；既然係咁，將來唔知會唔會執個「Big Ben 頭」？
而周三佢參與球隊操練嘅時候，依然將頭帶戴到好高；種種迹象都顯示今次廣告擺明造假！講開操練，佢新隊友阿倫就真係幾無奈，因為第2日係公開操練，好多球迷入場睇熱火打練習賽；現場竟然有班疑似佢前東家、塞爾特人嘅球迷，專登着埋綠軍波衫入場噓佢！
反插水法針對「三頭犬」
另外，今年聯盟更新球例，推出「反插水法」，訂明第一次發現就罰5,000美元（約39,000港元），之後再犯就再罰重啲，第6次插水被發現的話，就要罰停賽；規則有啲針對插水功力一流嘅熱火「三頭犬」獲迪、保殊同大帝。
就連球隊教練史普路斯查，今次都決定幫理不幫親，話全力支持新規例。不過，有正必有反，熱火防守專家柏迪亞就唔認為新規例會有咩成效：「點為之插水先，插水嘅定義喺邊？中間有好多灰色地帶，我只係認為如果要罰的話，攻守插水都要罰。」