亞視舊年誤報江澤民逝世，搞到中聯辦憤慨，但CCATV似乎冇吸收教訓喎，前晚再誤報發展局局長陳茂波懷疑醉駕接受警方調查。
亞視10月3號晚10點半新聞，去到尾段突然報道，「發展局局長陳茂波懷疑醉酒駕駛，接受警方調查」。報道話謬波嘅秘書晚上回覆亞視，謬波10月2號喺食肆飲過酒，過咗一段時間先揸車離去，佢有信心符合法例要求，並冇醉酒駕駛咁話。但亞視最後又話喎，新聞秘書引述陳茂波講，佢冇被捕。係醉駕俾差人調查之間，亞視似乎前言不對後語，而且局長10月4日中午12時35分出稿，話自己係「主動聯絡港島交通部希望警方跟進」。
咁點解亞視報道單新聞得咁少料？連片都冇？而且仲甩甩漏漏？八方估計，佢哋因為臨時臨急收到風，所以咪做到咁是是旦旦囉。
為減殺傷力搶先自爆
邊個放料？有理由相信，有人眼見醜行遲早曝光，索性自我引爆。自爆，通常係希望獨家新聞變成所有傳媒都有，咁第二日就唔會有咁多人跟進，令醜聞殺傷力大減。其實，劏房局長專用揦鮓招，上次回應劏房事件都係深夜11點59分出稿，等傳媒尤其報章已截稿難以報道，果然係死性不改。醉波嘅謬論，連藝人歐錦棠都睇唔過眼。歐錦棠噚日喺facebook串爆醉波話，如果要搵執法部門，佢建議搵有份查李旺陽「被自殺」嘅湖南公安局，因為李旺陽「死咗、燒埋、化埋灰嘞，都仲可以鑑證出係『自殺』，呢啲咪就係先進嘅執法集團囉！」
mailto:[email protected]
蘋民洗版：波波醉駕你點睇？
Fanny Fong
波波就算醉駕未必成立，切雙白線、逆線爬頭都有晒罪證啦，差人係咪應該做嘢呢？以為自己係高官就無事嗎？
Man Ka Wu
劏房波講得出板間房不等如劏房，實講得出酒駕不等如醉駕！
Esther Tam
唔可以俾呢種人喺政府度混，明知法例不容許，咁樣醉駕，即是向法律挑戰，總之佢一定要下台謝罪。
Wildman Chan
下台啦！仲狡辯？
Raymond Lai
酒後醉駕，低級錯誤，陸續有來。
節錄自蘋果日報facebook留言