周樹佳走的是條非常路，他做過編劇、記者、《今日睇真啲》創作主任。13年前他放下這些，轉身投入本土民俗研究，從此以清蘸、廟宇、墓穴、圍村等等為伴，並樂此不疲。撰文：黃晉昜攝影：譚盈傑
實地考察跟足全程
周樹佳的著作都與香港民俗有關，講廟宇、神祗、習俗、絕版書，甚至他在網上熱播的鬼故事也離不開本土主題。或許，港人已經歷過北望神州的浮躁喧囂，至今逐漸重新認識到香港本身的好，令他這份不顧一切的堅持更覺可貴，別以為鑽舊研古就一定七老八十，1999年他放棄電視台高職時才35歲，正值壯盛之年。說起周樹佳，十之八九會想起《恐怖在線》，他是該網台鬼古節目的嘉賓主持，對香港掌故如數家珍。他離開亞洲電視後，每天起床就揹起背包，打量自製的日程，哪裏有節慶、廟會、清蘸……他就到哪裏，不論港九新界，即使要上山下海入圍村，他都拿着相機和筆記，在古廟舊村中搜集民間風俗故事。「我唔係學院派，無理論要講，我做嘅係實地調查、田野考察，去現場同人傾偈、影相、攞資料，而且唔會去一次就算，最近我跟緊九龍城一個大長隴，大長隴係潮州人祭祖儀式，一去就三日，每朝七點半起身起程到現場，一直踩到夜晚，返屋企仲要入相入資料，日日瞓得嗰四個鐘，今年之後，出年、後年一樣會去跟進。」這些極其寶貴卻一直未受重視和保護的本地風俗，被他陸續整理成書，也成了他在工聯會教學的課程內容。早些時，有學校邀請他主講一些相關主題的講座，漸漸，走在他身邊的人多了，「以前邊有人會追住舞火龍影相㗎？家？自己班學生之外，出面都多咗其他志同道合，一齊影相。」
政府保育很皮毛
周樹佳在大學念中文系，按照慣常軌迹，畢業後一是執教鞭，一是入傳媒，他選擇後者，讀過無綫編劇訓練班，也曾任職記者，「1989年我入亞視做編劇，做Research writer，度過吓Gag show，嗰陣嘅香港電視台好自由，有好大發揮……」其時，北京民運如火如荼，他甚至可把有關敏感題材以笑中有淚的手法變成一個Gag，而真正讓他在行內贏得掌聲的是1994年的《今日睇真啲》，嘉利大廈火災、彌敦道槍擊案、八仙嶺大火、張子強案等等，他都是前線新聞工作者。「印象最深係嘉利大廈大火，嗰日我坐車返廣播道，喺尖沙嘴離遠見到天有條煙柱，立即收料，」周樹佳道：「後尾知道有火災，咁自己位置最近，梗係第一時間趕去現場啦。」結果，他比新聞部更早到達肇事現場，得以拍下不少珍貴片段，部份片段後來更被CNN借用，成為電視台一時佳話。「嗰幾年，我部電話從來都唔會熄，亦無話放乜長假，總之日做夜做。」2000年，亞視轉手，新老闆開始緊縮員工福利，他於是興起了我自求我道的念頭，「我哋咁搏殺，你話Cut就Cut，咁不如做啲自己想做嘅嘢啦，靠自己，賺多賺少都無怨無悔吖嘛。」愛古也愛書，周樹佳坦言受父親影響，「爸爸去到邊都拎住本武俠小說，又鍾意買字花，成日都會買份叫《快訊》嘅字花報，呢份報紙有好多關於民間嘅古靈精怪資料，睇睇吓就多啲留意。」後來入行電視台，他主理過不少節目的特別環節，其中一個環節講香港墓穴，更是他興趣所在，直接驅使他後來著書立說，寫成《香港名穴掌故鈎沉》。「咁多年來，香港政府嘅保育工作其實好表面好皮毛，真正需要嘅教育宣傳根本無做好，」周樹佳：「我舉個例，香港有十個太平清蘸，當中以長洲清蘸最出名，其實一般常規嘅清蘸根本無搶包山呢回事，但歷史博物館偏偏就將長洲清蘸作為範例，咁咪大家都錯晒囉。仲有，啲區議員同地方政務官，連自己管嗰區有乜歷史俗例都唔知，總之一收到投訴就禁止燒衣、唔俾乜唔俾物，喂，呢啲係香港傳統嚟㗎，你禁晒咪失傳囉。」
敬鬼神而遠之
網上電台大行其道，他也獲邀到《恐怖在線》講鬼古。對他來說，鬼古也是民間風俗一種，「我信有鬼神，不過我敬鬼神而遠之，我會去知道同了解，但唔會干犯佢哋。至於家網民好鍾意去嘅靈探團，我唔會參與，亦唔建議大家去，實在太危險，即係等於去北極近距離睇北極熊一樣，會出事！」他的鬼古，從來不會道聽塗說，即使自己不是親身目擊，也只會轉述第一手資料，「即係去到最盡都係我聽你講，你係第一身經歷，如果你都只係聽番嚟，我就唔會再講出去。我未見過鬼，但唔等於無，好似神打咁，我親身見證過唔少試刀場面，我唔係睇完就信，我係一路跟進，當然都有呃人嘅，如果睇到破綻，我唔會再追落去。」問他考究香港靈異故事有甚麼難忘事，他想一會才說：「幾年前，我收到料話銅鑼灣某酒店後巷放咗個神主牌，於是我同報料人、節目主持人去現場考察，發現氣氛的確有異，第一，現場有拜祭過嘅痕迹，一家西式管理嘅公司竟然容許員工拜祭，證明事有蹺蹊；第二，神主牌上面寫住『無主孤魂』四個字，從呢啲旁證去睇，嗰度應該有問題。」
放肆換來安逸
他研究風俗，從來不涉政治，不過新政府上場，卻有很多事讓他看不過眼，其中他最反感的是國民教育，「最初我無特別留意學民思潮，後來在電視睇到幾個細路講說話有紋有路，於是上網下載有關國民教育嘅資料，一睇，好明顯有問題啦，做乜要我聽《南泥灣》而唔聽香港民間小調？《南泥灣》擺明宣揚共產黨㗎！仲有，點解要我哋上井岡山而唔係上丹霞山？講出嚟好似好好聽，但魔鬼藏喺細節裏，就係呢一種。」正討論得鬧哄哄的香港東北問題也令他氣憤，「唔好聽人講，自己睇文件就知道政府講大話，係為香港解決房屋問題的話，點解交通線全部向北？普通市民都仲可以俾你呃到，我哋一睇就知道發生緊乜事。」這裏說的「我哋」，指的不是民俗學研究者，而是新聞工作者。
他是我浸會中文系學兄，我用一把世俗的尺去量度他的選擇──當日由電視台跑出來，由管理層轉成自由工作者，鑽研的又是冷門學問，可想像他走的路有多艱難，尤其對於我們這種習慣打份工、習慣安穩的人來說，這是難以想像的大膽與放肆。他亦承認，當日在電視台的同儕，早就一個個位列行業中的高層要位，不過他認為他今天得到的滿足感，是打一份工所不可能給予的。「物質對我嚟講唔重要，我對食、對衣着都無乜要求，手機用緊舊型號，我唔需要乜Phone物Phone，係最近老婆送咗部iPad畀我，對我教學方面真係方便咗，其他嘛？最大開支係買書同做實地考察嘅車馬費，早餐我限定自己最多廿四蚊、午餐三十蚊，晚餐盡量返屋企食，你話我唔開心咩？但我可以做自己鍾意做嘅嘢……」想想自己曾經文藝過的當年，再數數還剩下幾多年期的長命樓債，誰更安逸？我心知肚明。
