孫耀威大前日喺微博貼出一張自己下巴腫得好犀利嘅相，話自己口水腺發炎，頸同下巴腫到連吞口水同講嘢都有困難，睇咗醫生打咗針之後，老孫話唔想傳染畀女朋友陳美詩（Macy）同媽咪，所以自我隔離。不過前晚老孫已經出動，佢戴住口罩，揸住架七人車載Macy去銅鑼灣新寧道開餐。
素顏嘅Macy同老孫戴住黑色情侶帽，到達新寧道之後，老孫將架車交咗畀代客泊車，跟住就同Macy上咗中國太平大廈一間日本餐廳會合朋友。不過上咗去唔夠15分鐘，又見到老孫走番落車，幫女朋友攞番條披肩，可能餐廳冷氣凍，亦見到老孫對女朋友幾細心。
啪針頂硬開工
老孫餐飯食咗大約兩個鐘，之後佢Macy及班朋友一齊落樓，見到有記者，老孫依然好有禮貌say hi，佢話：「今日朋友生日，佢哋食我冇食呀！」跟住就車女朋友走，臨走Macy仲同記者揮手，兩個都咁有禮貌，值得畀個like佢哋！噚日老孫喺微博上載一埋藥嘅相，仲話再打一針，今日就要開工。
採訪、攝影：徐錦池、吳耀輝
