狼振英喺撤同唔撤國民教育課程指引之間，落咗「指引失效」一招，點都唔裸撤，令國教陰魂不散，反國教嘅同學仔自然冇得解甲歸田，要繼續抗戰。好似今日下晝CY原本應邀出席孔教學院喺灣仔伊館舉行嘅「孔聖誕」典禮，有大埔孔教學院何郭佩珍中學嘅學生，發起今日着黑褸出席，當面向CY反國教。
黑色係反國教顏色，何郭佩珍嘅學生要響應唔難，因學校嘅外套就係黑色。有學生喺校內壁報貼出告示，叫大家今日齊齊喺CY面前雙手打交叉，向CY說不、向洗腦國教說不。不過，由於發生南丫島海難，主要官員呢幾日取消非必要活動。特首辦噚日話，CY今日唔會出席。咁又係，海難仲有好多善後，加上劏房局長陳茂波酒後駕駛，叫CY拜孔夫子，不如留喺總部求阿爺幫好過啦。