蘋機會：東京女攝者　博愛菲林數碼

近年復古風吹不停，連帶菲林攝影一樣成為潮人玩意，憑「Tokyo Girls Alone」作品出晒名嘅攝影師 Jimmy，佢原本也執着過，但家已經睇化，反正有得影先最緊要。
記者：韓繼聰
攝影：潘志恆

菲林與數碼之間

一拿起相機即露出天真表情，完全感受到Jimmy對攝影的熱愛。

唔少攝影人都喜愛菲林的獨特質感，甚至說數碼幾靚都不能代替菲林，Jimmy曾經亦有相同諗法。參與唔少大品牌廣告及時裝拍攝的Jimmy，兩、三年前仍執着於用菲林工作，到今時今日卻已經是另一番光景。「廣告客戶都喜歡即時睇相睇效果，用菲林根本無可能做到。」加上Jimmy覺得數碼質素越嚟越好，只要識得做一啲後期功夫，一樣可以做到菲林的質素，好似佢其中一幅紅隧口的巨作，原來都只係用一般單鏡機拍攝，好誇張。當然，說到菲林，Jimmy亦總有一番情意，在不同時期都有所愛的菲林，特別喜歡立體感和景深都較強的「大底」。好似曾經鍾情6×6四四方方的構圖，到近年迷戀6×7那種像油畫的Size。自言極愛拍攝的他簡單地說出了創作者的心儀器材、媒介都好重要，「好似一個畫家如果好愛畫畫，世上就算無晒顏料畫紙，佢就算只用沙，都會繼續創作。」

「Tokyo Girls Alone」系列以拍攝一百個女生為目標，有時影得仲勤力過真正工作。

攝影秘訣：重量不重質

訪問得名師，當然想問吓佢有咩攝影秘訣。「其實無乜秘訣，光圈快門呢啲其實好簡單，最緊要係影多啲。」Jimmy口中「影多啲」唔單係為練習，更甚者係因為家攝影太易，好多人都可以偶有佳作，但要有「一系列」佳作則要大量不停地拍攝。「所謂風格，其實就係按自己性格喜好，不停反覆拍攝，而建立出嚟。」Jimmy自言拍攝廣告只為搵食，最愛還是藝術攝影，一有空閒即會拿相機拍攝自己真正喜歡的東西。好似有唔少人認識「Tokyo Girls Alone」系列，就係希望用最自然隨意的手法，拍攝女生最自然的一面。「商業攝影好多嘢都係堆砌營造出來，呢個Project畀機會我用最真誠的一面面對人同攝影。」

近期以AKB48為主角的月餅廣告，Jimmy話拍攝過程相當開心。

為海港城拍攝的廣告，除硬照外，也有拍攝短片。

Jimmy話相對於廣告，時裝拍攝自由度較大，發揮藝術創作的空間較大。

名師眼中的名師

1.Gregory Crewdson：攝影作品規模龐大，一張相片可動用過百萬製作，場景極富電影感。

2.Helmut Newton：呢位時裝攝影大師的藝術性十足，富舞台感，影響唔少現代時裝攝影風格。

3.Richard Avedon：經典人像攝影大師，拍攝人像出神入化，同樣影響唔少現代時裝攝影風格。