昨日是前港男陳志健與羅樂林之女羅苡之結婚的好日子，身穿踢死兔的新郎陳志健在李思捷和高鈞賢等八名伴郎團的陪同下到酒店接新娘，陳志健委託好友森美在電台示愛，結果順利避過接新娘的遊戲環節，抱得美人歸。談及婚禮花費，一對新人坦言有很多贊助，由七位數字減至六位數字。
身穿踢死兔的新郎陳志健乘坐軍車於九時半左右到尖沙嘴金域假日酒店，由李思捷和高鈞賢等八名伴郎團陪同上酒店房接新娘，事後李思捷和高鈞賢大讚姊妹團高質素，高鈞賢說：「我哋只係玩sit up同埋食炸嘢，本來佢哋想玩李思捷，不過最後我幫佢頂咗，食咗條炸春卷。」
身穿紅色露背旗袍戴上龍鳳鈪及金豬牌的新娘子，被老公以一雙強勁臂彎抱上軍車，圍繞西九行大運。
外母訓示女婿
新任外母陳寶儀坦言很感觸，問到有否訓示新郎？她說：「冇乜㗎，但係我有搭住佢膊頭重語氣咁講：『如果你咁咁咁，我就會咁咁咁，跟住仲同佢講咁咁咁自己填乜字，好彩佢都好錫我個女，家佢哋有自己世界，不過做父母點都喺佢哋身邊。」她又稱不心急抱孫。
一對新人下午在酒店內切蛋糕兼接受訪問，陳志健笑說：「知道老婆鍾意森美，一早安排搵咗森美今朝喺佢嘅電台節目度示愛，結果因為時間太趕，有好多遊戲都冇玩。」羅苡之笑說：「我朝早聽到佢哋開收音機好嘈，叫極都唔熄都知係有啲嘢。今日爸媽都好感動，媽咪眼濕濕。」
羅樂林送金器
陳志健表示稍後將赴蘇梅度蜜月，至於婚禮的花費，他們說：「基本上好多嘢都有人贊助，所以由七位減到六位數字。」新任外父羅樂林表示送了金器給女兒：「我好簡單，最緊要佢哋開心就得，要互相扶持同包容。」此外，一對新人晚上筵開48圍酒席宴請好友。陳寶珠與兒子楊天經夫婦晚上出席婚宴，寶珠姐坦言送上現金券給一對新人，問到會否傳授相處之道？她笑說：「相敬如賓。」
採訪：譚倩宜、文國駿
攝影：陳俊強、黃偉雄
