華華每年中秋節都收到唔少月餅，今年亦收到半島、文華東方、蓮香、奇華同埋黃双如自家製五仁月餅。前日同朋友講開，最鍾意都係半島同黃双如出品，文華亦OK。點知呢位老友一聽到月餅就火都嚟埋，講咗一個不愉快嘅收餅經歷。
臨近到期先寄出
事緣佢9月下旬出門多日回港，發現錯過咗一個掛號郵件，不以為意，心想放完個中秋長假先去攞。點知掛號信到手，先知係星展銀行送嘅文華東方月餅卡。佢一望，換領日期由9月9日到9月30日，大嘆過咗期真可惜，但睇真啲，張卡係20號先寄出，老友即刻火都嚟埋，因為就算佢冇出門，都未必一定喺屋企，銀行方面係咪要早啲寄，等客戶預番啲時間去攞呢？咁遲先寄出，真係好冇誠意。老友話佢大大話話都有八位數存款喺呢間銀行，有誠意就應該早啲寄啦！好多信用卡都唔使寄掛號，點解月餅卡反而要掛號呢？