【台北忠孝東路】現年29歲嘅女神陳妍希，另一半到底係邊個，一直都受宅男關注，一時傳柯有倫出入香閨，一時傳周渝民喺七夕合作廣告後撻着，不過佢哋原來都係煙幕。陳妍希日前被發現凌晨時份喺台北忠孝東路出動通宵唱K，同行嘅係徐若瑄舊愛、身家多達50億新台幣嘅毛巾太子爺賀錫敬。當時佢哋鬼鬼祟祟，前後腳好避忌，擺明係想將戀情收收埋埋。
捱眼瞓冧女
陳妍希其實仲早過徐若瑄認識賀錫敬，佢哋當年係美國南加州大學嘅師兄妹，先後返咗台北各有各忙少咗聯絡，近排有朋友相約先多咗見面，咁啱賀錫敬同徐若瑄又甩咗拖，獨身男女好容易撻着。當日，佢哋凌晨4點唱K唱通宵，為避嫌都搵啲朋友做電燈膽，唱到差唔多天光6點，佢哋分別離開，賀錫敬仲貼心搵咗個男性友人送陳妍希返屋企。
對於新戀情曝光，陳妍希例牌否認，佢經理人話佢哋只係朋友關係，至於賀錫敬就話冇可能。陳妍希曾講過擇偶條件希望對方肯為佢付出，餓咗要買嘢畀佢食，病咗要送藥照顧，呢次佢凌晨口痕想唱K，賀錫敬都捱眼瞓出動，咁細心真係合資格。撰文：林妃
