港府打壓樓市措施奏效，搞到地產公司高層要轉行揸的士？非也非也，查實係會德豐（020）同社企合作，去學校同學生介紹「鑽的」，搞到集團常務董事黃光耀一時興起，坐上的士司機位扮揸車畀攝記影相啫。乜野係鑽的？鑽的係可以畀輪椅上落嘅無障礙的士，舊年2月面世，雖然暫時車隊只有五架車，但據鑽的行政總裁梁淑儀（唔係周梁！）話，近日有善長仁翁願意買幾架車租畀鑽的公司用。黃光耀噚日聽到都話有興趣，考慮以個人名義投資幾架做善事喎。
一架「鑽的」40萬
梁淑儀噚日仲大賣廣告，話一個的士牌大約660萬，家仲升緊，而一架鑽的嘅車價就大約係40萬，即係用700萬做善事之餘，既有租金收入，又有升值潛力！會德豐即將開售嘅何文田Kadoorie Hill，入場費要2000幾萬元，夠買三架收租，不過唔知邊樣升值潛力高啲呢？