陳方安生亡母方召麐係國畫大師人所皆知，但自從06年過身之後，都冇再喺香港舉行個人畫展。由董建華妹妹、金董建平打理嘅畫廊多年嚟都代理方女士畫作，噚日開始至星期日都喺會展展出10幾幅方女士嘅畫作，以「雄渾勁健」為主題，每幅畫都係佢唔同年紀階段所作，例如有講香港回歸嘅「順利回歸」、寄情山水嘅「黃河皮筏」、「荷花」等等，都可以欣賞到呢位近代僅有嘅女性國畫大師嘅功架。
陳太噚日喺畫展開幕典禮致辭笑指，亡母早年喪夫，但一直都無放下畫功，孜孜不倦向唔同大師學習，好似趙少昂、張大千等等，最終大成，但可惜八個子女包括陳太佢自己，冇一個可以遺傳到母親天份，或許一個方家真係只得一個方召麐係有咁嘅天份成為國畫大師咁話。