阿爺未放完假，港股似乎冇乜方向，恒指繼續喺高位徘徊。回顧港股第三季表現不過不失，恒指升咗7%，本地地產股居功不少，無論係一線定係二線發展商，股價全部屢創新高，睇嚟都要同伯南克講聲多謝。除咗地產股之外，其實醫藥股都係強勢板塊，只係較少人提及，近日走勢最強嘅，就係市值較大的山東威高（1066）及國藥控股（1099），前者做醫療用品，後者係藥品分銷商，今日魏力推介嘅就係國藥喇。
講起呢隻國藥，相信股民都會諗起佢曾經係新股嘅風頭躉，2009年上市之後，用咗短短半年時間，就比招股價升咗一倍，高見38.60元，可惜之後進入大跌浪，跌到17蚊左右先識停。
不過睇番佢業績，係越做越好嘅，自上市之後，營業額持續向上，剛公佈的上半年業績，營業額超過600億元，賺近10億元，毛利率亦止跌回升，3年前的全年盈利，家半年已搞掂，但股價仲係當年的三分之二，現價實在抵買，近月股價走勢轉強，今周更加突破咗橫行區阻力，創全年高位，似乎已經有唔少基金入場，建議26元樓下買入，目標先睇27.50，之後就挑戰30蚊大關。
魏力
http://www.facebook.com/2012jason