現今樂壇青黃不接，可以孭飛嘅歌手真係買少見少，唔怪得好多昔日巨星都返出嚟開騷啦，好似葉蒨文啱啱先喺紅館唱完四場，明年2月就到關淑怡接力。馮仁昭收到風，47歲嘅陳慧嫻都蠢蠢欲動，決定明年再戰香港樂壇，佢除咗計劃喺紅館開騷，家仲同舊娘家環球傾緊合約諗住出碟，實行全面回歸。
憑《儍女》、《千千闕歌》同《跳舞街》等多首名曲走紅嘅慧嫻，試過幾次告別又復出，1990年因為去美國讀書離開咗幾年，01年又因焦慮症退隱兩年，04年就為咗環球人事變動同唱片業低潮悄悄消失。
下月廣州開騷
對香港樂壇心灰意冷嘅慧嫻，呢幾年返咗內地不停唱騷賺人仔，佢啱啱先喺南寧開完演唱會，11月尾就去廣州唱，難怪佢食住個勢返香港啦！馮仁昭打電話畀慧嫻經理人趙潤勤，佢承認慧嫻明年有大動作：「佢會返香港出碟同喺紅館開騷，家同環球傾緊合作，華納都傾過，不過環球始終係娘家，機會率高啲。」