食京菜幾時都係要去北京先正宗,不過下下為一餐飯搭飛機,你估我啲錢使唔晒咩,好在自己勝在識捐窿捐罅,唔使坐飛機,只要喺落馬洲過關轉一程的士,就有正宗北京美食,北京烤鴨、涮羊肉統統等緊你嚟試。文、攝:中行線
商場發現古典紅磚爐
講到北京烤鴨,香港除咗改名叫片皮鴨外,仲求其攞隻燒鴨當烤鴨,就算唔係食家都一食就知龍與鳳啦;但係深圳福田呢間「貴友京菜館」就唔同,老闆係正宗北京人,食物嘅做法完完全全係北京正宗,好似北京烤鴨咁,老闆趙先生就堅持一定要用柴火炭爐烤鴨,所以就算菜館喺商場之內都搭咗個磚爐。唔講唔知,做一隻烤鴨原來工夫多的是,先要將鴨上味,醃最少五個鐘,之後要好像做吊燒雞般將鴨風乾,再將鴨放入雪櫃雪一晚入味;到第二日有客order,再用磚爐烤熟,而且,為令鴨皮加添果香味道,柴揀選荔枝木,故烤出來的鴨隻隻飽滿,皮脆之餘更有果香。
片皮數目定要「發」
上枱時,每隻烤鴨都可以片出108片皮肉,不過,大廚笑說:「現在的人都吃不到那麼多肉,所以我們都片得大塊一點,片出88片皮肉。」講真,多少無所謂,最緊要好食,餅片上放上大葱、青瓜、甜麪醬,和即烤鴨肉一吃,北京以後都可以唔使再去啦!
傳統涮羊肉 膻得正宗
北京烤鴨故然係菜館的招牌菜,但涮羊肉亦都係北京必吃美食,食涮羊肉當然要用傳統的金屬炭鍋,不用gas爐。清湯底以北京直送香料炮製,羊肉選用內蒙古的羔羊,薄薄一片,放入熱湯輕輕一灼,再蘸上芝麻醬,正宗!怕膻味嘅朋友可以試其他,春餅拼盤是北京人新年時必食的,盤內有炒蛋、粉絲、炸醬肉絲、青瓜條,大葱、韭菜、豆芽,用餅片捲起來食,寓意大吉大利。大家熟識嘅北京紅燒茄子、茴香大包、京都肉餅等等當然都有得食。
胡同洗手間爭留念
食物吸引,門面亦甚有傳統胡同feel,大廳放上不少清朝、民初時的擺設,好像掛在牆上的乾隆針織刺繡,雖然唔係真嘢,但一樣充滿靈氣;廳房全用木枱木凳,天花掛上大紅燈籠,懷舊味道十足。連洗手間都與別不同,趙老闆話,呢個洗手間係根據以前北京胡同而設計,男女洗手間兩道門都係從舊有胡同拆過來裝上,不少人都爭住喺洗手間門前影相留念。信不信由你,model靚女方便完,即刻攞私伙相機出嚟拍照留念。貴友京菜館地址:深圳東園路台灣花園大廈二樓電話:(86)755-8224 2318交通:福田口岸乘的士5分鐘左右,約¥25。