教授難忘嘉偉落堂仍求教

教授難忘嘉偉落堂仍求教

【本報訊】「好勤力,好主動問嘢,如果唔係佢唔喺度,我今(昨)晚就會上堂教佢。」上課坐首排、下課勤請教,理工大學電機工程學系主任何兆鎏教授形容為「好少見」,短短兩堂課,卻已令何印象深刻。只可惜,這位學生就是港燈新入職員工,名叫許嘉偉,十.一晚登上了南丫四號。上周完成最後一堂星期四的課,師徒從此陰陽永隔。
何兆鎏教授昨午佇立在舉行追悼彌撒的聖約翰座堂一隅,向他的好學生道別。嘉偉今年24歲,從高級文憑開始一直在理工大學就讀,只差兩科,便完成碩士學位課程,何教授正任教其中一科。「每個禮拜四我都會教佢,最近先開始上咗兩堂。」

兩堂課留深刻印象

何教授說嘉偉很勤力,「我一落堂就行埋嚟我度,同我一齊行返出去(校門),路程都幾遠,一路行一路問課堂嘅嘢,又講工作嘅事,所以印象好深。」
何教授說,雖然名字不太記得,但肯定認得相貌,「收到消息時我睇到個名,再望望幅相,我好唔開心,我喊,因為……冇幾耐之前,佢仲係咁問我嘢。」嘉偉成績好,主動又勤奮,何教授憶起不禁又哽咽。
嘉偉今年8月始獲聘加入港燈,何教授說他很幸運,「好多同學都好想入去工作……國慶遊船河煙花團都係抽籤抽到,點知幾樣所謂好彩,加埋會變咗送佢去不歸路,我自己好唔舒服。」
何又指,校方會將剩餘的學費退還嘉偉父母,「昨(前)晚打過嘉偉手提,佢爸爸聽電話,爹哋講咗兩句已經開始喊。」

安排將證書交家人

他說,嘉偉的成績已足夠取得深造文憑,現已向校方申請,問題不大,稍後會安排將證書交給其家人。
何兆鎏說,學校氣氛凝重,「大學裏面教過佢嘅老師、佢嘅同學,心情都好沉重,好哀痛。」
何兆鎏希望家屬能盡量宣洩情緒,「喊出嚟,唔好鬱喺心裏面。要記住,香港市民都好支持佢哋,希望佢哋可以慢慢平復。」
理大的網頁經已轉用黑白色。署理校長陳正豪發出訃告,證實嘉偉和該校01年機械工程學理學碩士畢業生、42歲的港燈工程師徐志偉均不幸罹難。
何教授說,校方會再行安排悼念活動,向遇難者告別,「我哋會永遠記住,曾經有過一個好好嘅學生、好好嘅朋友,喺我哋之間出現過。」