噚日推介嘅美麗華酒店（071），悶市下抽升5.7%，證明磚頭有價有市，今日推介合和實業（054），潛力更大。合和中心二期經多年擾攘，終於同政府達成協議，預計年底動工，主席胡應湘一償宿願，呢個大Project絕對值得看高一線。雖然項目要到2018年先完成，但合和作為灣仔大地主，旗下商住項目如合和中心、GardenEast及QRE Plaza，租金估值勢將上調；喜帖街項目進行得如火如荼，有望明年初推售，未來業績已有保證。集團位於跑馬地嘅豪宅樂天峯，仲有三成單位未賣，港島靚地買少見少，項目更見珍貴。
旗下合和公路（737）近期走勢凌厲，以合和持股七成計，總值87億銀，相當於合和市值36%，加上派息吸引，大股東合和最先受惠。合和最新每股NAV 36.50元，相當於現價27.50元嘅1.3倍，以PB 0.85倍作目標，可見31元，潛在升幅13%，中長線價值一旦反映，升幅肯定不止此數。
唐牛