出版專才，大編輯，專欄作家老關加入中央政策組為全職顧問，退休兩三年後又有一份高薪厚職，爽過爽報。有報導話老關可能專注替梁特首寫政策稿，寫演說稿，有啲似前朝嘅小劉嘅角色。老關在新亞書院社會系1972年畢業，小劉在歷史系1988年，而小劉亦曾做過壹週刊編輯，評論員，兩人背景有啲相似，點解一個為曾生服務，一個為CY效勞呢？當然係親疏有別之故啦，小劉有煲太針大力推薦，老關則有九龍華仁老同學邵善波做中策組主管，你估世界上好多事係會無緣無故嘅咩！香港有好多不明道理嘅空想主義分子成日批評親疏有別，不是用人唯才，公平公開咁樣招聘，其實係儍儍地。全世界政治任命，都係親疏有別嘅啦，有乜出奇，唔通奧巴馬會搵共和黨右派才子同佢寫演講詞，搵Paul Bryant做白宮預算總監？他日羅姆尼如果當選，入主白宮，又點會搵奧巴馬啲「芝加哥幫」人馬在白宮工作呀！奧巴馬上任後，讓希拉莉做國務卿，明顯係一個政治交易，找共和黨人蓋茨留任國防部長兩年，係伊拉克阿富汗戰事緊張所逼，唔敢突然更換指揮之故，到佢摸熟情況之後，蓋茨咪醒目地告退囉。同樣道理，英國保守黨首相金馬倫點都唔會搵工黨文禮彬做外相嘅啦！懂得政治現實，就毋須批評梁振英用人唯親，只能批評佢啲「親信圍內」上任後是否做到事，交到貨，令市民滿意。蘇菲與老關顯然都係CY「圍內」，兩人同入中策組，左丁山冇乜意見，唔會批評咁多，只係望佢地以後在中策組能夠為香港有啲貢獻啫。係邵善波之友，在政府有運行者還有運輸及房屋局副局長邱誠武，小邱在聯合書院時係學生會發燒友，1982年生化系畢業，1984年加入邵善波創辦嘅「焦點」週刊，邵老兄當年抱負甚高，要辦一份中文Newsweek或Times，專搞政治時事，延攬了新亞書院新聞系嘅陳慧兒，李玉蓮，以及生物系嘅吳志森，全部係熱血青年，甘心一腳踢，為雜誌賣命。三十年過後，陳慧兒為唐英年競選助陣，吳志森在報紙批評CY不遺餘力，李玉蓮比較低調，退出新聞界後在中大教吓書，慳番啖氣咯。