2012年，屬於年輕人覺醒的一年。
自稱「門常開」的政府總部，直至被學民思潮佔領才真正屬於人民。十旦十夕裏，黑衣人逼爆公民廣場，自言是「政治冷感」的19歲少女黃嘉祺，抱着「食花生」（網上潮語，等睇好戲的意思）心態前往，拍下幕幕畫面而被喚醒，還把廣場片段剪輯成五分鐘長的《沒有如果．就有選擇》短片，願與廣場一起遍地開花。
「我叫KiKi黃嘉祺，係中大新聞與傳播學院二年級學生，生於小康之家，細個時鍾意睇TVB，貪佢唔使用腦；媽媽就鍾意睇戲，嗰陣覺得佢揀啲戲又長又悶，點知中大推介嘅就係呢啲片，家先知係好嘢，反而發現TVB劇越來越渣，唔睇咯。
一年級時拍過一套片叫《香港可以流浪嗎？》，當時袋住大約70蚊即興喺香港流浪，四圍行咗六日五夜，感覺係香港太細，唔係流浪嘅好地方，加上道路只畀車行，靠行路好多地方都去唔到。不過當時太過在意拍畫面，玩得唔夠放，有機會會再試一次。
贊成退出廣場
我自問政治冷感，連反對國民教育嘅7.29遊行都冇去，直至學民思潮佔領政總，9月1日舉行黑色開學禮，我都係抱住『食花生』嘅心態去睇嘢。
但係食花生又有何不可？最少肯睇?件事，當晚我逼到台前，剛好有人宣佈會接力絕食，一班人為一件事咁堅持，畫面令我好感動，拎住部啱啱買嘅二手相機，開咗拍片功能影低情況，然後再去了解。
由9月3日到9月8日佔領行動結束，我每一晚都有去，唔敢講話好了解件事，但當全世界都反對，肯定有啲道理，政府知唔知點解呢？呢場運動令到好多人覺醒，醒咗就唔好再翻瞓啦。
我贊成退出廣場 ，因為梁振英講嘢好叻，呃到中立嘅人以為佢讓步，如果無限期留守，有機會好似佔領中環咁變質，不如用另一種形式繼續。而我就將片段剪輯好放上YouTube，希望更多人覺醒。」
記者：吳淑義