【跑馬地】
同正印女友Anita到談婚論嫁階段嘅蘇永康，最近被指同廖碧兒合作CTI電視劇《童話戀曲201314》時撻着，佢仲向人獻殷勤，不過前晚戴住黑超嘅蘇康就只同媽咪去跑馬地撐枱腳食雲吞麵，半粒鐘後，蘇媽蹺住阿仔隻手散步，行到地產舖就停步，啲樓盤全部由一千萬至三千多萬元不等，蘇康都同媽咪睇到指手劃腳，證明佢嘅購買力唔失禮。睇完一輪蘇康就照顧媽咪上車，見到記者都禮貌揮手打招呼，跟住開車走人。
唔啱嘴形
同緋聞幾乎絕緣嘅蘇康終於開齋同廖碧兒傳緋聞，女方被問到發展機會時話「Never say never」，但蘇康就好決絕，佢噚日喺電話度話：「I can say never！我同女友好好，唔打算換，廖小姐係筍盤，我係爛地，筍盤點會喺爛地度起呢？我同廖小姐只係合作咗十幾日，溝通唔多，我都冇佢電話，冇共同話題，上次拍《法網群英》同徐自賢拍埋床上戲都冇傳緋聞，點解今次咁奇怪呢？」蘇康話同咗喺法國做緊嘢嘅女友備案，佢又話總之一定會結婚，亦會公開。
採訪、攝影：朱志聰、徐錦池
