十月一日放假，例牌跑馬，左丁山一行六人，十二點就到達馬場，立即見到來自陝西延安市嘅安塞縣民間腰鼓團，表演據稱有千年歷史嘅「安塞腰鼓」。延安市，中共革命聖地也，十月一日跑馬開場之前，廣大馬迷明唔明白其中奧妙呢？冇延安呢個大本營，就可能冇一九四九年十月一日之毛澤東站在北京天安門高呼中華人民共和國嗰一幕啦；馬會在十月一日搵延安市安塞縣腰鼓團表演，好識do啫。跟住就係香港最著名嘅男高音，富豪資本家家族後人莫華倫表演，現場聽到幾位女馬迷講：「今日早啲入場就係要聽莫華倫。」論歌聲，莫華倫稱雄香港，無人能及，佢先唱一曲「祖國，慈祥的母親」，左丁山以前未聽過，問吓隔籬幾位老友馬迷，佢地亦話未聽過，呢首歌在莫華倫演繹之下，配合抑揚頓挫嘅旋律，十分悅耳，至於專業樂評家有何評論，要問吓著名樂評人Oliver Chou先，不過唔知道佢有冇聽過呢？後來才知道，呢首曲係莫華倫自作自編自唱嘅，又係一位非常之識do嘅音樂歌唱家，北京應該聽得好順意。表演壓軸戲與跑馬前奏曲就係警察銀樂隊伴奏，莫華倫主唱「起來，起來，不願做奴隸的人民……」男高音一出聲，果然不同凡響，如果唔係要肅立嘅話，相信全場馬迷會拍爛手掌！國民教育課程是否會撤回、不撤回、失效，隨得學校教唔教，教育界唔知，左丁山唔知，不過呢樣嘢唔駛教嘅，每年十月一日入馬場就明白國民教育何處不在啦，馬會有錢（因大量馬迷捐獻），有意無意之間推廣國民教育，特別大場面，寓娛樂於教育，無聲無色，入場32,184人，如何不受落。今屆特區政府接下前朝拋出嘅手榴彈，手忙腳亂，唔識拆彈，夾硬推銷，爆到高官與梁特首面目模糊，佢地不如多啲到馬場學吓軟銷之道啦，知道乜嘢叫做包裝至得。呢，國慶盃就由理文造紙大股東李文俊嘅「包裝選擇」爆冷勝出，跟住佢細佬李文恩隻「包裝博士」贏埋第十場，一家人贏到笑，唔似得左丁山咁笨，飲杯「紅山茶」，一瀉如注，幾乎腳軟到唔識行出馬場！