近幾季港甲唔少地區球會為吸引球迷入場，不時減價只收20蚊；至於新軍橫濱FC（香港）就反其道而行，竟然對強隊時加票價，認真大膽！足總早排公佈，應橫濱要求，下周日喺旺角場對傑志，正價票加到100蚊，特惠票亦要40蚊。好在傑志呢場波有踢過英超同西甲嘅柏保路干拿高候命落場，睇吓有猛將登場加埋橫濱送波衫同毛巾，可唔可以打響呢個「加價算盤」啦！
自從足總同橫濱公佈對傑志場波加價後，球迷響本地足球討論區《球迷大聯盟》議論紛紛；有球迷話，南華同傑志上星期交手都只係收60蚊，今次要畀多40蚊，隨時貪字得個貧。
過千件波衫毛巾贈球迷
我求大俠睇番港甲近年賽事，好少夠膽加價，對上一次收100蚊，已經係09年，當時晨曦響青衣對南華，結果只得944位球迷入場，呢個戲碼都唔夠1,000球迷，算做失收；再對上一次收到100蚊，就係00年南華對快譯通，當時最貴收120蚊，特惠票就30蚊。
橫濱教練李志堅噚日練波前，就幫日本高層解畫，佢同求大俠講：「日本球會高層研究過，賽事搬去旺角場踢，場租等成本會高咗，試吓將票價定番高啲；當然唔係諗賺錢，主要係想了解吓有份量賽事嘅反應，而今次撞啱傑志有個咁重量級新援加盟，仲可能落場，應該會有多啲吸引力。」堅sir話，會方已做好準備，有過千件波衫同毛巾送畀橫濱球迷，希望fans到時多多捧場。
傑志金靴新援可登場
至於橫濱周日嘅對手傑志，噚日朝就有99年幫西班牙奪取世青盃兼拎埋賽事金靴獎嘅柏保路干拿高首度跟操，總領隊伍健亦專程到場睇操；不過，干拿高因為前日至落機，只係輕鬆進行適應訓練，暫時冇乜嘢睇，但身型就keep得幾好。
干拿高收操後，用相當流利嘅英文受訪，佢話，越南球季完咗後就返咗西班牙，仲一直有跟當地球隊操練；狀態梗係未百分百，但操多幾日，周日應該可以落場。「傑志響西班牙好出名，早已認識雅高、丹尼同列文等，既然有機會，覺得可以嚟香港試試。」
有人快活有人愁，之前被傑志棄用嘅前巴塞青年軍卡里爾，噚日落實借用到南區，仲立即隨新東家操練；傑志會將負責卡里爾部份薪金。