【巴黎直擊】
巴黎時裝周火熱進行中，楊紫瓊、吳佩慈、應屆世姐于文霞等於香港時間昨日凌晨都出動睇騷，侯佩岑出席家鄉台灣幫的品牌活動時，瞓身低胸大露背撐場，更坦言婚後可以更free！另一邊，珍妮花洛庇絲（Jennifer Lopez）則和嫩口新歡Casper Smart邊看騷邊咬耳仔晒恩愛。
台灣品牌夏姿（Shiatzy Chen）於香港時間昨日凌晨在巴黎舉行時裝騷，楊紫瓊、2012年應屆世界小姐于文霞和吳佩慈等捧場，楊紫瓊臨開騷才趕到，架上墨鏡、穿上紅色旗袍的她由保鑣保護入場，排場十足。
擱置生BB
台灣幫侯佩岑一身搏盡的火紅裙撐場，開deep V低胸又大露背，搶鏡非常，她直認力撐夏姿：「我真是她們的忠實粉絲，任何地方有活動，香港、內地，我都盡量去，有活動就一定首選這個品牌的衣服。」所以性感支持？她笑笑說：「結婚後，更加可以做回自己啦。」
問侯佩岑何時做媽媽？她說：「不想這麼快，雖然已到了生BB的年紀，但也想多自由一兩年呀。」她表示正忙於做時尚書，今個月會推出名為《微時尚》的新書，講述自己的時裝故事。同場的林莉則表示留在巴黎個多星期，有點思鄉：「之前喺北京買咗啲潮州月餅去食，留喺巴黎可以吸收時尚氣息。」
籮霸晒恩愛
此外，籮霸珍妮花洛庇絲前晚抱女撐Chanel，之後的Valentino騷就改為孖嫩口新歡Casper Smart拍拖睇騷。籮霸和Casper入場後，與Mr.Valentino、名模Natalia Vodianova一齊坐，她和男友煙韌蹺手，男友又不時跟她咬耳仔，晒恩愛晒足全程。
採訪：梁錦雯
攝影：葉君海
