曾幾何時，前火箭得分王麥基迪（T-Mac），係NBA最令人聞風喪膽嘅射手之一。可惜歲月催人老，如今33歲嘅佢，因為近幾年嘅傷患，已經變咗一隻冇牙老虎。近日，佢老友Rick Wayne爆響口，話佢將會退休。咁後生就冇得撈，同贏過得分王嘅艾華遜一樣，真可惜。
呢位6呎8吋高嘅Swingman，自從上季不獲鷹隊續約之後，就好似消失喺空氣之中，剩係早前傳出紐約人有意想羅致佢。當大家都以為呢位得分好手，會回巢繼續球員生涯嘅時候，點知呢間出名二五嘅球會，一個屈尾十要久休嘅R華萊士出山，都唔要佢。佢位做導演嘅老友Rick周二喺Twitter話：「恭喜我老友@Real_T_Mac退休啦！你永遠都係NBA神話！」吓？唔係呀，咁快就退，信唔信得過㗎？消息一出，內地就傳出CBA青島隊想搵佢加盟，都唔知係咪堅。
T-Mac係唔係真退休就未知，但係咁早就退休，就算你15個球季搵成1.6億美元（約12億港元）都好，筆錢可能50歲都未到就用晒。最佳例子梗係家冇嘢撈嘅艾華遜，佢最近同喺泉州品牌「艾弗森」簽約做代言；最大鑊嘅係呢個牌子係山寨版，可想而知佢有幾唔掂。