亞視收視低迷，早排《ATV焦點》抹黑學民思潮搞到唔少網民發起罷睇亞視，就連亞視外判節目《娛樂CIA》主持董敏莉上月15日出席節目宣傳活動，被問到擔唔擔心《CIA》收視下滑時，佢都忍唔住話：「直頭冇收視。」
錄咗唔畀播
雖然董敏莉講嘅係事實，但就辣㷫亞視投資者王征，就算節目唔係亞視製作，亞視都講到明要封殺董敏莉唔畀佢喺亞視出現。其實製作《CIA》嘅傳訊媒體為咗撲熄亞視怒火，已經私底下禁咗董敏莉一個星期唔畀佢出鏡。點知前日董敏莉入大埔亞視總台錄影《CIA》，亞視高層竟然唔畀佢入廠，同傳訊媒體嗰邊拗咗好耐，雖然最後董敏莉成功錄影，但亞視堅持唔畀佢錄嗰集出街，結果《CIA》臨時搵咗另一主持路芙錄影頂替。
噚日馮仁昭向《CIA》監製鄧特希了解，佢話：「我都係臨時拉伕啱啱過嚟幫手，所以好多嘢唔太清楚，只係知董敏莉係有少少麻煩。」傳訊媒體營運總裁李先生就話：「葉家寶（亞視高層）有打嚟問過，應該係誤會一場啫。」
