有私營醫院計劃引入本港首部同一槽有兩架電梯嘅雙子電梯，其實香港寸金尺土，精打細算嘅地產商早就開始打電梯主意。新鴻基中心喺90年代初已經率先引入雙層電梯，即係兩架上下相連嘅電梯，一部停單數層，另一部停雙數層，慳番一個槽。吓吓計到盡，至少多番幾百平方米樓面面積，但乘客就唔多方便，一部電梯停，另一部就算冇人出入都要停低一齊等。查實呢款雙層電梯係幾十年前嘅low-tech設計，但係喺樓價升到癲嘅環境，近年落成嘅國金中心二期，同埋最新嘅希慎廣場都一樣採用呢種low-tech嘢。如果可以成功引入各自分開運作嘅智能雙子電梯，計到盡嘅地產商一定好有興趣。