今次海難嚟得太急太突然，好多政府中人都亂晒陣腳。食物及衞生局局長高永文噚日凌晨趕到醫院探望傷者，被記者追問傷亡情況時，高醫生嘅偉論令在場記者無不「O嘴」。可能真係唔夠瞓累事，佢話，喺沉船事故之中，最容易致命係乘客或船員跌落水，但又唔識游水，又或者有一部份人撞船時受咗傷，影響咗逃生能力，「如果佢哋真係浸水（遇溺），可以最快幾分鐘就致命」。八方都知阿媽係女人，山係石頭海係水，咁大眾化水準嘅答案，實在唔使醫生或者局長，求其一個市民都知啦，可能高局長當時真係太眼瞓，影響思考能力。
消防處新聞官失晒蹤
除咗局長失準，消防處新聞官仲失埋蹤。話說噚日朝早有記者想確認消防總共派出幾多人協助搜救，準備出號外，所以打晒畀處方三位新聞官，點知成個鐘頭都搵唔到人，惟有致電政府新聞處求救。再等多成個鐘，中午時分新聞處人員先回覆話：「我哋都搵唔到佢哋」，睇嚟真係忙得好緊要，辛苦了。