民主黨要痛定思痛，噚日先開一場叫做「跨越」嘅集思會，聽吓黨員對立法會選舉失利有咩睇法，之後就開記招交代結果。雖然何俊仁唔再係黨主席，不過佢仍然相當受歡迎，唔少傳媒都硬係要仁哥影番張相先放佢走，而真正主持記招嘅就有署理主席劉慧卿，同埋黃碧雲、蔡耀昌、羅健熙。早前已經盛傳，民主黨未來主席好可能係黃碧雲同胡志偉兩位新紮議員之爭，噚日交代集思會嘅記招，獨獨賣甩咗胡志偉，唔通黃碧雲係最後跑出人？實情係另一回事，呢次檢討未來路向工作中，黃碧雲參與相對多啲，所以咪搵佢咗出嚟囉。黃碧雲自己就話，暫時未諗到選主席嘅問題，首要目標係做好議會工作先喎。