晉佳幾個月前講過美國10年期國債孳息率同港股嘅關係，當美債孳息率喺跌勢之中見底回升，就證明資金從債市流出，咁港股就自然受惠上升。睇番過去廿幾年美債孳息率月線圖，形成咗下降通道，每次孳息率跌到去通道底就會反彈，亦係港股中長線見底之時，對上一次係2008年11月底，之後港股就出現大升市。不過，呢條下降通道已經去到好低水平，要孳息率跌到去通道底嘅1厘左右，難度相當高。與此同時，晉佳發現美債孳息率嘅9個月RSI出現咗三底背馳（孳息率浪低於浪，RSI就浪高於浪，見圖紅圈），近兩個月已呈初步回升趨勢，係長期見底回升嘅徵兆。過往30年，10年期美債孳息率只出現過3次9個月RSI底背馳，分別係86年4月至8月、91年12月至93年9月，同埋01年10月至03年5月，基本上每10年出現一次。相對港股，恒指係86年8月至87年10月，由1913升到最高3968，13個月內累升107%；93年6月底至94年1月，就由7676升到最高12599，升64%。至於03年嗰次，就由5月升到07年10月先肯停，累升237%；唔睇咁遠，只睇底背馳完成後嘅中線升幅，去到04年3月都升48%。
明年有機上試3萬點
換言之，過去30年每逢見到美債孳息率9個月RSI底背馳就入市，恒指一年內可以升5成！以今年7月美債孳息率三底背馳完成一刻計算，即係恒指19796作為起點，明年內可上試3萬點！不過，RSI底背馳可以低處未算低，三底背馳之後，可以係四底背馳，甚至再做下一個底部。但根據晉佳嘅觀察，對投資者其實冇壞，只會令你提早享受升市來臨，賺得更多。以91年12月至93年9月為例，其實92年9月美債孳息率已經出現一次RSI雙底背馳，去到93年9月再出現一個底部先見底，如果閣下喺92年9月底入市，當時恒指僅5505，好過等到93年9月底升到7676先嚟入市。美債孳息率長線去到極低位，反映美債價格好高，買嚟都冇勝算，資金最終會流去其他資產市場，刺激股市上揚，邏輯上非常合理。如果重複過去30年趨勢嘅話，港股未來一年表現實在值得期待。晉佳本欄逢周一、三及五刊出