當微軟近來密鑼緊鼓搞Windows 8時，科技界另一大佬Google已經靜靜超越微軟，晉身全球市值第二大科技公司。
市值暫超1% 仲有得贏
Google呢排股價密密破頂，周一晚最高見過765美金，收報761.78美金，市值達到2499億美金（1.95萬億港紙）。此起彼落，微軟周一晚下跌，市值2472億美金（1.93萬億港紙）。換言之，Google市值只係超過微軟1%左右，暫時只係贏個馬鼻。不過要拋離微軟有幾難吖，噚日傳出Google日內完成收購烏克蘭人面識別技術公司Viewdle，涉及資金3000萬至4500萬美金，炒友隨時借消息再炒一轉喇。Google排第二，第一位係邊位？咪就係蘋果囉，周一市值6181億美金（4.8萬億港紙）！Google暫時應該拍馬都追唔上。