NBA各隊陸續舉行傳媒日（Media Day），代表新一季亦都快將展開；來季披起火箭戰衣嘅「林瘋」林書豪，就好謙虛話仲有大把嘢學，暫時以幫球隊打入季後賽為目標。
林瘋上季喺紐約人大爆發，成為聯盟一時無兩嘅球星，面對傳媒追訪已經習慣晒；周一出席火箭傳媒日，同新隊友好似柏臣斯、M莫里士有傾有講。而林瘋今夏到過台灣、中國、香港等地訪問，行程緊密，初步睇林瘋都冇咩發福，只要克服左膝傷，應該可以保持上季風采。對於新一季球隊前景，始終有史高拉、C里爾等離隊，24歲嘅林瘋好謙虛咁話：「我嘅職業生涯只打咗50幾場，只係開始，仲有好多嘢要學，而球隊亦十分年輕，暫時目標放喺季後賽資格度。」火箭10月10日就會喺季前賽面對上屆西岸冠軍雷霆，林瘋亦都可能首次為火箭上陣。
獲迪棄波神投李寧
新一季新作風，上屆總冠軍熱火嘅後衞獲迪，亦都有新搞作。據報10月1日佢同波鞋贊助Jordan約滿後，就會轉投中國品牌李寧懷抱，係奧尼爾之後，李寧牌另一位MVP級球星；不過因為合約期未完，獲迪喺早前嘅傳媒日同季前練習，都仲着住Jordan波鞋。
而上季季後賽失利嘅公牛，亦原班人馬再戰，球隊宣佈同教練泰保杜續約4季，新合約由12/13球季開始，合約薪酬總值1,800萬美元，泰保杜認真和味。
