市場一直傳緊，今年3月中捱義氣做俄鋁（486）主席嘅張震遠（Barry）要花時間做公職，隨時唔做，傳聞終於變成事實，俄鋁噚日凌晨宣佈，Barry辭任主席，留任獨立非執董。
傳做過秘密警察
接任做俄鋁主席嘅57歲Matthias Warnig並非等閒之輩，有報道指，Warnig曾經喺70年代做過東德秘密警察，同當年身為前蘇聯情報人員嘅普京，老友鬼鬼，不過Warnig否認此說，話91年先識普京。俄羅斯報章又報道過，Warnig喺1989年、柏林圍牆倒下前幾個月決定退休，90年再蒲頭，已經喺俄羅斯做緊賓架！睇番俄鋁對Warnig嘅介紹，冇講佢81年畢業之後至90年之間做乜，只介紹佢家喺俄羅斯身居要職，例如掌管天然氣資源企業，兼任俄羅斯國有銀行VTB董事。俄鋁股東爭嗌未完，普京親信入局，點都比Barry有助控制形勢嘅。