踏入第四季，唐牛先祝各位戰友繼續贏到開巷。回顧第三季，歐美無限量放水，港股進賬逾7%，祖國股市就死吓死吓，連2000關都穿過。十八大落實11月舉行，政權順利交接後，A股有望打翻身戰；相反，歐美央行法寶盡出，如果歐債或者經濟數據有乜冬瓜豆腐，就只能望天打卦，港股繼續夾係中間，會向走左定向右走，仲係未知數。翻查上季紀錄，板塊輪流炒作情況明顯，計有績佳股、高息股、內房股、REITs以及近期強勢嘅本地地產股，只要捉到路，就算遲入場都有一定水位。既然呢期磚頭股最紅，今日就推介主打中港澳地產市場嘅九龍建業（034），集團上半年賺8.7億銀，增長5.1%，主要受惠北角曉峯熱賣；旗下深水埗景怡峯及堅尼地城加多近山項目年中開售，連同瀋陽江灣城項目，未來業績可看高一線。九建經過一輪急升後，正於9元水平打底，以每股NAV 17.50元計，PB僅0.51倍，短線見10蚊不是夢。唐牛