問世界各地球迷，到底幾點開波先最好？大家或會答：「只需遷就一個人，就是我」。香港球迷當然想歐洲全線中午開波，可食住晚飯睇，不用捱更抵夜。在西班牙，兩年前卻只會在晚上開波（即香港凌晨12時後），大賽更在晚上10時開賽，因為要遷就當地球迷習慣，日間去教堂，吃個長晚飯，才「夜媽媽」入場享受球賽，結果苦了亞洲球迷，睇皇馬對巴塞要捱到凌晨5點。時代不同了，講全球化，講衞星轉播收益，當地人喜好不再重要。西甲及意甲早場越來越多，實行初期當地球迷、球員以至少數球會老闆全線鬧爆；但在以錢行先的世界，你有你鬧，賽會當你唱歌。至於英超開賽時間最啱亞洲人胃口，但這其實不是以商業角度出發。上世紀90年代前，英國波多在周末下午3時（香港時間晚上10至11時）開賽，原因是英國足球流氓特別多，為免醉鬼晚間散場生事，規定周末主要在日間開賽。其後為滿足電視轉播再增加不同開賽時段，但最夜還是香港時間約1時，間接令英超易在港大行其道。當大家只在考慮入場觀眾和電視轉播之時，有否為落場比賽的球員着想？2014巴西世界盃在即，開賽時間又惹爭議。為遷就歐洲轉播時間，部份賽事會安排在中午烈日當空時舉行。各方已在炮轟賽會有否考慮球員的健康；球迷自私點，都擔心像94美國世界盃決賽的0:0「悶熱大戰」會否大量重現？方柏翹now足球評述員