活士呢幾日冇贏過波，最後一日對住上一屆單對單嘅手下敗將莫利拿尼。嗰陣球隊以1分落後，活士就算贏咗，雙方總分打和都係衞冕嘅歐洲隊捧盃；「老虎」見到咁嘅形勢，就好灑脫咁放棄最後一洞唔打，雙方終於打和各得半分。活士咁灑脫係好有風度，但莊家真係多得你唔少！
失盃卸膊兼黑面
輸咗個盃之後，活士個樣仲黑過平時，冇打第18洞嘅佢，仲唔肯將敗因歸咎於自己身上。佢話：「喺得呢度，贏係一齊贏，輸都係一齊輸。恭喜歐洲隊，佢哋打得好好，呢個盃佢哋應得嘅。」冇錯，客軍最後一日真係打出超水準，但係到緊張關頭，所有人都指望你呢位高球史上最出色球星可以孭到飛，你咁講真係有點兒卸膊。
活士仲話就算佢贏咗第18洞，最多打和，點都阻止唔到歐洲隊保住個獎盃。佢話：「去到第18洞時，其實已經完咗，我哋係一個團隊，呢個係團體戰。就算我贏到，個盃都係畀歐洲隊留住，所以完成比賽已冇意義。」你覺得冇意義，但係賭波公司唔係呢，聽講因為你最後一洞棄權，買咗歐洲隊嘅波友笑晒，威廉希爾就輸咗成50萬鎊（約630萬港元）！