長毛獨有嘅女人緣，好多人恨唔嚟。噚日佢去到會展準備喺十．一酒會示威，一入場即刻被一位女士「癡纏」搭訕，呢位女士其後仲變身「實Q」，協助「抬走」長毛，唔通想趁機向長毛「抽水」？咪以為呢位女士係普通人，佢其實係已故船王包玉剛嘅長女蘇包陪慶。
蹺實長毛要求帶路
做咗立法會議員後，長毛年年都出席十．一酒會，旨在入場叫口號示威。今年當然唔例外，但當佢噚日踏入酒會現場時，就即時被一位三唔識七嘅女士熱情「兜搭」，問佢女廁喺邊度，仲不問情由下蹺實長毛隻手要求帶路。
長毛話當時已經叫佢搵第二個幫手，點知對方死纏爛打唔肯走，仲不斷拉扯佢，當時直覺認為對方唔想佢喺現場「搞事」。及後當長毛高叫「結束一黨專政」口號時，呢位女士竟然變身為「實Q」，同其他十幾廿名保安一齊捉住長毛，夾手夾腳抬佢走。
最好笑係成班保安抬抬吓，先發現無啦啦多咗個女「外援」，有人即刻同呢位「熱心市民」話：「唔使幫手嘞，可以行開啲」，呢位女士先肯放過長毛咋。八方過佢名牌，發現佢係蘇包陪慶，估唔到堂堂船王長女，做事咁鬼「親力親為」喎。
mailto:[email protected]