喺美國伊利諾州麥地拿高球場舉行嘅萊德盃，去到最後一日嘅單對單比賽，出現戲劇性戰況；頭兩日落後嘅歐洲隊，喺呢日發力狂追，美國隊孭飛打最後一場嘅活士贏唔到，客隊以總分14.5:13.5反勝，奇蹟衞冕萊德盃。
麥艾萊領軍反勝
歐洲隊首發3位球手，當奴、羅尼同麥艾萊順利擊敗對手，將首兩日比分10:6嘅劣勢追平，球隊即時氣勢如虹，甚有反勝嘅氣勢。雙方之後咬住咬住，要鬥到最後一組，活士對莫利拿尼場波嚟分勝負，最後雙方打和，各得半分，歐洲隊單日狂掃8.5分，得以衞冕萊德盃。
助客隊將比數推到14:13嘅德國球手基馬，喺贏咗自己場波之後，即時衝埋去攬住隊長奧拉沙保。佢賽後話多得德國名將蘭格幫助：「從來未試過咁興奮，上周六我同蘭格傾過兩句，當時我哋有講過萊德盃，因為我覺得自己嘅比賽態度唔夠正面。第一日我打得好差，我想打得好啲，所以先會搵蘭格。」佢仲好多謝隊友嘅支持：「加西亞衝咗入嚟恭喜我，仲有好多其他人，我感受到贏萊德盃嘅喜悅。」
美國隊長撐到底
至於美國隊長盧夫就完全唔怪球員，最後一日嘅表現不濟：「我都冇晒計，其實我哋都打得唔錯㗎啦，要做嘅已經做晒。我同唔少人打過一隊，但係呢一隊係最好嘅。」都係嘅，對手3大球手今日交足功課，主隊輸只可以怪「蜀中無大將」。