《銅鑼灣皇室堡》
楊思琦今年初喺美國未婚產下女兒楊卓穎，搞到俾人話佢係大話港姐，雖然明知好多人對自己印象唔好，不過為咗賺錢養女，思琦都要硬住頭皮返香港搵奶粉錢。單親媽咪又要湊女又要搵錢，仲要面對形象一落千丈嘅壓力，可能咁樣搞到佢有少少躁鬱症嘅傾向。
前日中秋節下晝5點幾，思琦妹開住七人車載媽咪同6個月大囡囡，去到銅鑼灣皇室堡商場嘅停車場泊車，打算行商場。
躁完笑番
見思琦妹瘦咗好多，臉部凹陷，之後個BB女由楊媽媽推住，同思琦去到一間賣護膚品嘅專門店，兩母女一邊睇一邊交換心得，大約15分鐘就已經買完離開。一出到門口，思琦妹見有記者喺度已經面色一變，加上早幾日先同記者衝突搞到報警收場，思琦妹開頭語氣都有啲煩躁，猛問：「你哋邊間㗎，你哋影乜呀。」
當記者心平氣和同思琦講完話影夠交差就走嘅時候，情緒飄忽嘅思琦又突然好似冇事笑晒口走咗，不過佢哋都好小心，為咗唔想囡囡曝光，都幫架BB車落簾。慳妹嘅思琦辦完免費泊車手續之後就開車走人。
採訪、攝影：楊浩賢、徐錦池
