最正路
英超
周日有場英超獨腳戲，英格蘭中部大戰，阿士東維拉主場1:1逼和西布朗。西布朗憑沙恩朗先開紀錄，之後維拉換入戴倫賓特（圖）及尼索比亞加強攻力。維拉到80分鐘靠戴倫賓特的入波追成1:1完場。
最爆
法甲
周日法甲頻頻爆冷，全部熱W都未能開出！除了榜首的馬賽作客以1:4大敗於華倫西恩斯外，里昂主場亦失威，以0:2不敵波爾多。另一場，聖伊天主場對蘭斯，賽前主W賠率熱至1.47倍，但最終踢和0:0。
最靚
米高利（巴勒莫）
周日意甲，巴勒莫前鋒米高利（圖）大演帽子戲法，其中一球更加是世界波，82分鐘，他在中圈附近窩利遠射，笠死對方門將射入，帶領球隊主場大勝基爾禾4:1，打開今季聯賽勝利之門。
最躁
尼馬（山度士）
甘美奧對山度士的巴甲，尼馬（圖）好像食了火藥一樣，波就入不到，被罰紅牌離場。在51分鐘，尼馬不滿球證判決，因為「衰多口」而被罰黃牌；兩分鐘後，他火氣未收，惡意侵犯對手，被罰直接紅牌離場。當時他跟甘美奧後衞柏拿爭波，而柏拿倒地，而尼馬就踩向對方心口。結果，山度士作客以1:1踢和甘美奧。
網友討論區
《卡卡仲好勁呀》
taktak14：「卡卡博到球12碼，加上有幾球差啲助攻，交足功課，但卡卡自己又射唔入。如果唔係，今場最佳球員都或者有佢份。」
王思苦大狀：「C朗有兩球唔畀佢（賓施馬）選擇畀卡卡，同埋C朗入完球12碼，卡卡第一個去慶祝又攬晒，真係好好朋友！呢場唯一唔開心嘅就係卡卡冇波入。」
《傑斯同史高斯害死曼聯》
kelmancchan：「今場上半場失兩球，就是史高斯打了防中那個位，但他又不去追波，或者追不到。兩球都係，個波在史高斯經過時，他都收步。」
ppken：「中場兩老嘅問題費格遜冇理由睇唔到，就算佢老人家睇唔到，佢啲助教都冇理由睇唔到！呢樣嘢成個教練團隊都有責任。」
oi1010：「可能後備落場會好好多，喺五五波搶中場嗰陣，史高斯根本搶唔到。」
資料來源：香港討論區