馮仁昭四圍超：
King地獄特訓迎戰娜姐 - 馮仁昭

周秀娜挾宅男女神嗰名，呢幾年成功殺入影圈，電影一部接一部拍唔停，佢嘅經理人Roy上星期喺北角大排檔同「A&F柯震東」趙勁皓（King）簽咗賣身契，有意力捧佢做新一代男神。
搶手King即時獲新片《Mrs. Boo》嘅監製黃永峰賞識，畀佢孭飛做男主角，近日女主角已落實係娜姐，King之前話過好恨同娜姐合作，佢嘅處男演出就係咁畀咗娜姐，據知呢部係功夫片，King同娜姐扮演情侶，King稍後就會地獄式接受動作特訓。

甜蜜拍拖迎月

對於有機會同娜姐砌磋演技，King鬼咁雀躍，佢喺電話度話：「好開心呀，我會努力做好啲，希望唔會失禮大家，我嚟緊都會開始練功夫。」King仲話好有興趣做打星。
此外，大前晚迎月夜，娜姐同男友Avis慶團圓，佢哋不約而同將玩螢光棒嘅相貼上Instagram晒恩愛，Avis仲放埋燒大蜆嘅相，睇見都流晒口水。