狼振英上場，就連十．一升旗禮及酒會呢啲「紅色」場合都要升呢﹗噚日喺金紫荊廣場舉行嘅升旗儀式，以及喺會展搞嘅酒會現場，再唔係由名校男拔女拔嘅合唱團主唱國歌，反而由著名男高音莫華倫（圖）粉墨登場，以「劇院mode」獻唱，令唔少嘉賓有「意外驚喜」。民政事務局發言人證實，莫華倫今年首度幫拖喺十．一活動唱國歌，但就無講明點解睇中莫華倫。除咗莫華倫，噚日嘅十．一酒會仲有一隊band演奏名為《門開得勝》嘅歌曲，為酒會打頭陣。嘩﹗政府明明就係門常關，新政府總部出入關卡重重，整首咁嘅歌嚟賀十．一，呢啲咪叫做「冇嗰樣，唱嗰樣」囉。