九月廿八日係孔子誕，中華民國定為教師日，台灣有盛大崇拜萬世師表活動。中華人民共和國在1976年四人幫倒台之年及以前，一貫批孔踩孔，當孔夫子係壞人，後來逐漸改變態度，仲以「孔子學院」為招牌，向國外發揮文化統戰影響力，新儒家學說（錢穆、唐君毅、牟宗三）在內地有市場，假以時日，孔孟之道，有望在中國大陸再度生根。
中文大學新亞書院以九月二十八日為院慶日子，每年此日（假日除外）有慶祝活動，兼且頒授獎學金及最佳畢業生獎，名為「誠明獎」。「誠明獎」始於1980/81年，當年有四人得獎，左丁山認得其中兩位已成為教授，就係在科大教歷史嘅陳榮開，及在中大教生物嘅邵鵬柱，此後1984/85年度無適合領受人，從缺，其他年份有一至三人得獎，譬如著名詩人王良和（86/87）。
此日在逸夫堂內，左丁山碰到一位稀客，就係退休已久，平時在高爾夫球場多過在中環嘅賓架L，佢老早在樓市及金融市場投資得利，歸隱多時，為乜今日在中大出現，佢笑到四萬咁口，大大聲話：「我嘅mentee攞誠明獎，梗係要返母校為佢鼓掌啦！」唔怕得罪，賓架L在新亞讀工管系時，成績中游啫噃，估唔到佢嘅mentee叻到震，係來自英皇書院嘅信廣來院長師弟，憑中五會考八科A拔尖入讀環球商業系嘅鄧俊賢，畢業GPA 3.82，主修科GPA 3.93，拿一級榮譽，連續兩年得中大英語演講比賽冠軍，全國大學生英語演講比賽一等獎，合和實業與Newsweek合辦全港徵文賽冠軍，在深水埗與大埔為新移民義務英語教師七年，到過越南偏遠鄉村孤兒院教英語，堪稱品學兼優，去年八月未畢業已得ibank聘書，但佢就選擇今年畢業後加入政府做AO政務官，現職民政事務總署。點解會咁？事關佢深信錢穆先生手訂新亞學規有言：「職業僅為個人，事業則為大眾」！另一位得獎人名鍾冠峰，來自長沙灣天主教中學，亦係會考尖子，主修心理學，一級榮譽畢業，熱愛學生活動，有「莊王」之稱，由系會、舍堂、迎新營、校慶活動、畢業禮無不參與籌辦，在陸運會五千米得獎牌，常到特殊學校、孤兒院、獨居長者宿舍探訪，今年在中大攻讀教育文憑，他日希望做中學通識科教師，服務大眾！