變臉變到十足翻版Angelababy嘅關心妍（Jade），同王祖藍成為今年十大傑出青年之一，噚日佢哋同其他六位得獎者到灣仔出席頒獎禮。
成為傑青咁大件事，唔怪得Jade同祖藍不約而同帶埋另一半出席，祖藍帶住女友李亞男同埋屋企人出席，佢情深款款話人生中最重要嘅女人都全部有到場，佢話：「嫲嫲、阿媽同佢（李亞男）都喺度，今日呢件事重要程度可媲美結婚，現場都好多朋友搵我哋影相同話恭喜，好似影緊結婚相咁。」
Jade多謝老公
至於Jade就有老公楊長智同媽咪現身撐場，佢話呢個獎老公都有一半份：「佢成日車我去做義工，出錢出力，所以個獎佢都有份。」講到變臉變到同Baby越嚟越似樣，Jade即話：「多謝報紙咁讚我，佢靚好多，我每逢出碟都會有呢啲新聞，習慣咗，冇乜嘢好回應，靚啲係好事。」咁老公有冇讚佢越嚟越靚？Jade話：「老公係話有冇咁靚，佢對啲新聞都係笑吓就算。」
