《銅鑼灣→跑馬地》
中秋慶團圓，今年7月爆婚變的詹瑞文，被揭戀上公司人妻同事Amenda。前日迎月詹sir竟分身有術，下午先陪小三Amenda聽講座，其後再到茶餐廳撐枱腳共享一碟炒麪，醫肚完即交人，冧未搞妥離婚手續的老婆甄詠蓓及囡囡。
現年47歲的新一代笑匠詹瑞文（詹sir）今年7月被爆婚變，他與太太甄詠蓓識於微時，女方03年為詹sir產女，有指兩人兩年前才註冊結婚。近年夫妻創立PIP文化產業，有傳公司人妻同事Amenda跟詹sir過從甚密，被揭是詹sir婚變的小三，又指她恃寵生驕，趁詹sir和太太甄詠蓓分居，索性掌控公司大權，儼然變身老闆娘，詹sir的私家車都得管接管送Amenda。前日適逢迎月，詹sir和人妻Amenda都撇甩另一半，下午先拍拖聽講座，跟住再撐枱腳。至晚上詹sir才交人陪分居的甄詠蓓及囡囡，度過了左右逢源的中秋佳節。
一碟炒麪兩份食
詹sir於3個月前承認跟甄詠蓓已分居一年，囡囡交甄詠蓓照顧，詹sir強調兩人再見亦是朋友，彼此間有默契，協議暫時分開做自己喜歡的工作，但不久後詹sir卻被爆搭上人妻Amenda。前日中午3時，放下妻女包袱的他便約Amenda到銅鑼灣大球場附近香港奧運大樓演講廳，參加「2012海靈格香港工作坊」講座。一連四天的講座以活得健康為題，但詹sir和Amenda的戀情涉及四角關係，複雜到離譜，他們去聽健康題材講座着實帶點諷刺。
講座長達三小時，詹sir的一頭白髮非常搶眼，離開時為怕被其他學員認出，兩人前後腳避忌走，其後他們由詹sir的司機駕駛保母車接走，火速到了跑馬地大少爺茶餐廳開餐，兩人大嘆炒麪和小食，一碟麪你一筷我一筷兩份食，親密又溫馨，二人全程有傾有講，大多討論人生哲理，其實他們早被爆共同報讀心理學家顧修全課程，有共同興趣，詹sir壓低聲音向Amenda說：「你人生入面會遇到好多人。」Amenda細聲回應，撐枱腳半小時後，他們再由司機接走，步出餐廳時發現詹sir和Amenda心有靈犀，同樣穿上靴子。
詹sir和Amenda坐車折返香港奧運大樓，可能發現記者行蹤，詹sir醒目安排司機先下車到停車場揸出落地約四個月、價值56萬黑色平治，好讓他可獨自開車撇甩記者，至於小三Amenda則由司機送到大圍名城。
Amenda口窒窒
記者昨日致電甄詠蓓，問到詹sir可有在中秋佳節抽空陪囡囡，她說：「我哋噚晚食咗飯。」可知詹sir前日中午分身冧Amenda陪聽講座？甄詠蓓大方說：「佢哋一齊工作，我唔會介意。」她表示未跟詹sir辦妥離婚手續，所以他們至今仍算「掛名夫妻」，將來可想復合？她則說：「呢啲好難講，要睇緣份安排。」
對比甄詠蓓的淡定回應，小三Amenda卻顯得驚青，她昨日在電話中口窒窒說：「我唔回應啲唔係嘅嘢，我哋同好多同學一齊去，我唔係娛樂圈嘅人，我嘅私生活上乜嘢堂，同邊個食飯唔回應啦。」Amenda也封嘴避談婚姻狀況。詹sir前日下午1時多，在聽講座前還在微博留言：「今晚去邊度迎月？有咩好提議！預祝大家中秋節快樂，人月兩團圓！」原來詹sir節目早排得密密，先冧新歡再陪正印，迎月夜很充實。
採訪、攝影：徐錦池、朱志聰、丁寧
心靈雞湯：$7300改善兩性關係
詹瑞文與Amenda前日拍拖到銅鑼灣參加的海靈格工作坊（圖），由87歲的德國著名精神治療師伯特海靈格（Bert Hellinger）與妻子蘇菲海靈格（Sophie Hellinger）主持，這個工作坊於去年和前年也在港舉辦過，反應不俗，今次則在香港舉辦一連四天，主題為《活得健康》，參加費用相當昂貴，參加全程工作坊（四天）需費7,300元，參加一部份（兩天）也需4,250元。伯特海靈格所創立的「家族系統排列」在02年被引入亞洲，通過此方法，讓人的兩性關係、親子關係甚至是自身的情緒問題得到改善。
食得招積：星光熠熠茶餐廳
詹瑞文與Amenda幫襯的大少爺茶餐廳位於跑馬地（圖），餐廳牆上貼滿明星如陳奕迅和黎明等的海報，招牌菜有大少爺炒飯、海南雞飯、扎肉湯河、焗豬扒意粉、豬扒包及蕃茄豬肉通粉等，每位消費大約50元，藝人容祖兒、少年食神Michael、張智霖、陳冠希、楊千嬅和丁子高等都幫襯過，可謂星光閃閃。據知該店老闆是無綫藝人梁烈唯的表哥Eric，有指英皇藝人鄭希怡（Yumiko）的髮型師未婚夫Andy也是茶餐廳老闆之一。
