《都是那些年》甲之熊掌，乙之砒霜。有人不顧一切追尋娛樂圈多姿多采生活，但亦有人不想過娛樂圈不穩定的生活，柏安妮（Ann）當年站穩女主角之位，反而對水銀燈下生活欠缺安全感，毅然將璀璨、繁華換回平凡生活。
撰文：羅美倫
柏安妮在85年加入新藝城，美貌驚為天人，發展一直順利，但她只在娛樂圈做了短短8年便離開，選擇做個腳踏實地的普通人。現職明德兒童啟育中心職業治療師的Ann，有兩個分別11及8歲的女兒，每星期上班三天的兼職已令她忙個不亦樂乎。
詐病赴泰國拍戲
出身自醫學世家的柏安妮，每日診治需幫助的小朋友，學以致用正是Ann最想要的，她笑說：「91年拍拍吓戲去咗無印良品搵份工做，因為唔係好鍾意拍戲，覺得唔夠穩定，冇安全感，唔係努力就有收穫，我鍾意實在啲，咪去搵份工囉。」當時Ann仍有拍電影，她記得去泰國拍《俠盜高飛》時向上司謊稱肚痛沒上班，後來有周刊登了相片，被老細查到她詐病捉去訓話，把她嚇個半死，其實當時她還在香港大學修讀生物系，在片場做功課時常被吳君如取笑。
在娛樂圈8年的日子，真正是少年不識愁滋味，每一天都是開心地過：「嗰時真係好似一嚿雲，完全唔知做緊乜，但玩得開心，唔使點做行行企企，化吓妝影吓相，成班同年紀嘅朋友得閒出埠拍吓嘢、宣傳，到時到候有人接返工放工，講幾句對白就收工，真好玩。」
從影8年，Ann經過了幾個階段，初入行時跟袁潔瑩、羅美薇、陳加玲一段「開心少女組」的日子最好笑；之後到《霸王花》、《霸王女福星》的打女生涯，吃力但依然好玩；第三階段就是拍陳可辛的戲，不用打的《風塵三俠》正是一個經典。
難忘與哥哥合作
問誰最令Ann難忘？她說：「張國榮，佢好錫我，樣樣嘢都預我一份，我到家都唔可以聽佢嘅歌，我會喊，一聽到就要熄機，因為好唔開心。」當年張國榮錄《Miss you much》這首歌時，突然打電話找她講開場的旁白，Ann至今仍記得，很惋惜對方的離開：「可能佢覺得自己要做嘅嘢做晒啦。」
Ann雖然生得靚，但在圈中緋聞少之又少，只出道時與鄭浩南拍過拖，及與梁朝偉拍《風塵三俠》時傳過緋聞，她聽到緋聞二字，笑着問：「同邊個？拍拖唔係緋聞喎，我嘅緋聞同邊個呀？」梁朝偉囉！她笑笑說：「係緋聞嚟嘅咩？」莫非是真拍拖不是緋聞？她鬼馬地答：「乜嘢為之真？同人拍戲之嘛，人哋已經同劉嘉玲啦，唔會啦，唔係好啱key喎，佢咁叻。」
甚少看娛樂新聞
對於昔日的娛樂圈，Ann記憶無限，但現在的圈中事只略知一二，因甚少看娛樂新聞，認識陳奕迅？Ann說：「係咪影相嗰個？哈哈哈……嗰個應該係Edison，我睇英文報亂咗，我知陳奕迅幾叻，女仔就鄭秀文啦，算上一代？啊……容祖兒，呢個都知邊個。」
離開娛樂圈，Ann的心血都放在工作及女兒身上，前兩年仍有讀兒童心理學，不過她讀完後覺得太過辛苦，現女兒漸漸長大，在功課上又幫不上，她會否找些興趣班進修？Ann說：「我鍾意做嘢，就算唔返工都做相關嘅嘢，例如幫人做顧問，職業治療裏面有好多瓣，呢排我想改善細路嘅社交能力，我嘅事業亦係我嘅興趣，所以覺得好好彩。」有幸福家庭又有能幫助人的事業，確是一份福氣。