最擔心：曼聯
波士執教16周年日逢破身，阿仙奴戰將真係唔爭氣，車仔打得好，無話可說，兵工廠上一課，個穩守突擊威力被對手洞悉；賽後記者問雲格對呢日有乜感受，佢斬釘截鐵話，「I never look back, I always look forward.」（我永不回望，我永遠向前！）其實輸一場波唔係世界末日，不過做人真係要向前看；同日曼聯都輸，但另一位長壽領隊費格遜，開波搵晒啲老人家同熱刺鬥快鬥搶，賽後賴球證補時唔夠長，唔通場場波，球證都任你舞咩？呢場佈陣有問題，下場聯賽作客鋒力更銳嘅紐卡素，難樂觀。
最黑馬：愛華頓
愛華頓今季真係唔講得笑，佢哋雖然近年由莫耶斯帶領下，必在前列位置，但都係好似差啲啲；翻查「拖肥糖」近季總排名往往比主場高，可證主場唔係踢高好多累事。不過今季隊波執得更靚，季初好醒神，如果唔係前次俾紐記完場前追和，已寫下主場3連捷。禮拜六上半場落後修咸頓後，好快入番3粒收工，寫下自04-05年球季後，開季頭6場最佳戰績，家喺足智彩冠軍賠率有50倍，波友有興趣買番10蚊例飛嗎？
漸入佳境：雷丁
喺〈英倫心聲〉嘅專欄讚過，放棄過，同上周貼中佢哋爆冷喺盃仔贏昆軍嘅雷丁；前晚對紐卡素瘋狂落票到平手盤，可見莊家同波友都知道佢哋上緊力，結果和2:2買讓球盤冇交收，其中因為側擊力強嘅占美基比終於喺聯賽打正選，有佢喺度，雷丁嘅橫出波多好多，有利普格恩耶克攻堅，基比今場仲入首球㖭。下場聯賽作客曇花一現嘅史雲斯，雷丁出冷開齋，個人唔會意外。
冇走雞：浦和紅鑽
無故大勝或者大敗，有時下場未必可以保持，日聯近期就有兩隊波嘅走勢來個逆轉。紅鑽主場狂吞飛腳5蛋後；今輪轉運，作客衞冕嘅柏雷素爾，靠大後備前鋒迪臣保保補時奠勝；相反飛腳主場喺不斷起票下，只能賽和今季一樣咁頹嘅鹿島鹿角，真係玩殘捉路派嘅波友。不過追到同第2位仙台維加泰同分嘅紅鑽，下場應該實食無黐牙，因為喺主場鬥頂級大魚腩札幌岡薩多；何況日本紅魔鬼得失球大落後，有需要盡數，等禮拜六博個[主其他]波膽，當主客和賭！
最單純聯賽：荷甲（圖）
屆屆來來去去，都係雙「燕」（燕豪芬同飛燕諾）、兩個「阿」（阿積士同阿爾克馬爾），加埋啱啱畀阿積士破金身嘅川迪喺前面玩晒；賽事唔難估，最啱小注攻大波膽博驚喜。信阿積士會逐漸走出後防兩星離巢嘅陰影，上個禮拜六主場對川迪保不失係個很好指標，朝氣勃勃，冧莊荷甲一啲唔奇。
蘋果波神