胡杏兒同黃宗澤分手後，似乎仍未從情傷中康復，佢呢排瘦咗好多，亦甚少展露笑顏。前晚8點幾，杏兒同家人喺銅鑼灣做節，佢哋揀咗去信記避風塘海鮮美食，仲好有風味咁坐喺船上，邊嘆美食邊賞月。
拖住小朋友
雖然現場氣氛唔錯，不過杏兒就似乎心事重重，全程低頭悶悶不樂，又不時攞住電話玩，甚少同媽媽、家姐同姐夫鄭泳舜等交談，就連美食當前亦唔見佢好好胃口。不過，杏兒見家姐照顧兩位小朋友搞到手忙腳亂，都有幫手同小朋友抹嘴。
杏兒一行八人食咗差唔多個幾鐘就埋單，落船時杏兒拖住小朋友，一盡阿姨責任。早前杏兒因為幫身為民建聯立法會候選人嘅姐夫鄭泳舜拉票而被網民鬧爆，但前晚佢兩個冇因為咁而顯得尷尬。杏兒落船時見到記者好愕然，仲笑住問：「你哋又知我喺呢度？死啦，我冇乜化妝。」鄭泳舜仲搞笑話食完嘢塊面好油。其間着咗件黑色薄衫嘅杏兒喺閃光燈下透出白bra，似乎失策咗少少，之後一行人慢步行去銅鑼灣攞車離開。
採訪、攝影：楊浩賢、吳耀輝
