蘋機會：誌上小龍女　感覺先決

無可否認M4/3相機的出現，吸引咗唔少小龍女（女性龍友）加入愛攝行列，當中外形可愛輕巧嘅OM EPL系列更係女生最愛。網上攝影雜誌《FILLENS》創辦人之一的Jenny，愛攝影愛到出書，喜好影人影景，同時也像一般女生般愛自拍。問她攝影心得，不是技術先決，而是感覺行先。　記者：韓繼聰　攝影：劉永發　模特兒：Ava @ Pure Models　查詢：Olympus 2376 2150

影人影貓爽快

Jenny有份創立的網上攝影雜誌《FILLENS》，以女生角度講攝影講生活，現時以雙月刊形式出版。編輯、設計、攝影都由她一手包辦，但原來Jenny最愛都係影「自己」，「無芒睇住自拍成日都要試幾次先影得靚，有個反芒直頭照鏡咁，方便好多。」說起E-PL5，Jenny說最喜歡它設有自動自拍mode，可每隔一秒自拍一張，一次過影多個鬼馬表情都得。至於Jenny個人喜好，則是生活感較強、較自然嘅相，例如外國民風嘅生活照，和好多女生都愛影嘅貓貓。「E-PL5的FAST對焦系統比上一代快好多，好方便SnapShot、捕捉人同物嘅神態，好似頭先影貓仔，基本上感覺係一按即拍。」Jenny邊拍邊說。

E-PL5的FAST對焦相當快速準確，捕捉人物神態一流。

自動自拍模式每秒自拍一張，總有一張啱心水。

可愛頭　專業底

「其實器材對好多女仔嚟講都係好次要，相機最緊要都係夠輕、外形夠靚。」細細粒嘅Jenny去到邊影到邊，相機跟身梗係越輕越好。E-PL5機身只重325g，外形更走番一、二代的復古風，加上可更換手柄及鏡頭蓋設計，可隨時換上波點、條子等花紋，女生真係好難唔鍾意。至於相質方面，一向玩樂味較濃的E-PL，今代用上與旗艦機OM-D相同的1,605萬像素CMOS及TruePic VI影像處理器，拍攝質素極相近。「E-PL5拍攝質素好高，影像非常細緻銳利，高ISO表現亦相當好。」可愛女生忽然換上專業口脗，勁！雖然新機欠缺OM-D的五軸防震同EVF，但價錢平一大截，兼享相同影像質素，係抵玩嘅。